Scena II
Giacinto e detto.
Giacinto – Scusi... Si può venire avanti?
Cesarino – Favorite, favorite.
Giacinto – (Chisto sarrà 'o giovene 'e l'avvocato. M'aggio dà nu poco di sussiego si no nun me rispetta!) (dandosi un'aria d'importanza) Dunque l'avvocato non c'è? Non lo si può vedere?
Cesarino – Ah! voi volete mia moglie! E quella stupida della cameriera m'ha detto che andavate trovanno a me.
Giacinto – (Io a chisto 'o faccio pazzo. Io l'addimmanno na cosa e isso me risponne n'ata. A me che me preme d' 'a mugliera.) Io la signora vostra non la conosco affatto e perciò...
Cesarino – Come, voi non conoscete mia moglie? Com'è possibile che non la conoscete?
Giacinto – Non ho avuto ancora questa fortuna.
Cesarino – Embè, quando la conoscerete, vedite che femmena è e quanto vale. Vi assicuro che resterete contento.
Giacinto – (Ah! ce sta tutto chesto? Chisto veramente ha da essere pazzo!)
Cesarino – Vedrete che talento, che dottrina, che scienza che tene. Già se la fa con piezze gruosse, tutti personaggi elevati, tutti Commendatori, Consiglieri, Presidenti, e tutti veneno 'a casa mia.
Giacinto – Ah! bravo! E voi ne siete contento?
Cesarino – Contentissimo. Vi pare, è la professione che lo porta.
Giacinto – E buon prò vi faccia.
Cesarino – Se avete affari da proporle per voi o per qualche amico vostro, potete essere sicuro che resterete soddisfatto.
Giacinto – E io me ne consolo tanto tanto. Voi siete il marito di questa signora?
Cesarino – Per servirvi.
Giacinto – Potete vantarvi 'e tené na bona mugliera.
Cesarino – Sì, confesso la verità, io non credeva 'e tené chesta fortuna. E dovete dire che io era negato per il matrimonio, ma poi vedendo questa ragazza così virtuosa ho detto: Neh! io addó 'a pozzo truvà meglio? Accussì subito subito cumbinaje 'o matrimonio.
Giacinto – E avite fatto buono. Ed è molto tempo che siete sposati?
Cesarino – Songo circa due anni, e debbo dire la verità che in questo tempo s'à fatta na bella clientela.
Giacinto – Ah! (ride) E voi lo dite con questa prontezza?
Cesarino – Ma se capisce, anzi me ne vanto. Quanta giuvinotte vanno truvanno na mugliera comm' 'a mia e nun 'a ponno truvà.
Giacinto – Come vostra moglie? Uh, ce ne stanno tante!
Cesarino – Vi sbagliate, caro signore! come mia moglie nce ne sta una sola...
Giacinto – Come vostra moglie...
Cesarino – Già, essa è stata la prima, e le altre con l'esempio suo verranno appresso.
Giacinto – E ccà vene 'a fine d' 'o munno!
Cesarino – La gente poi dice, è stata una donna fortunata. Dovrebbe sapere tutti i sacrifici che ha fatto, p'arrivà a stu punto. Basta dirvi che da piccerella s'à fatta 'a vita soia mmiez' 'e studiente.
Giacinto – E doppo tutto chesto vuje ve l'avite pigliata?
Cesarino – Se capisce! Quanno passaje la rassegna di tutti i professori, allora la madre me la consegnò, e mi disse: ho fatto il mio dovere.
Giacinto – Ma cheste sò cose da far trasecolare!
Cesarino – (È rimasto 'e stucco. Ha fatto effetto la mia parlata.) Muglierema me raccumanna 'e farle nu poco 'e reclame, meglio 'e chesto non 'a pozzo servì.
Giacinto – (dopo pausa) E st'avvocato tarderà molto a venire, io tengo da fà, nun pozzo aspettà.
Cesarino – Non pò tardà molto, ha ditto che veneva subito. Po' quanno 'a vedite allora ve persuadite che femmena è chella, già nun pare mai na femmena, pare n'ommo.
Giacinto – E dalle a coppe! Io me ne vaco pecché mi avite tuccato 'o stommaco (alzandosi).
Cesarino – Che, ve ne andate?
Giacinto – E ve pare che pozzo stà ccà a sentì tutte sti ciucciarie voste. Che m'avite pigliato pe nu papurchio?
Cesarino – Ah! vuje credite che sò ciucciarie? Embè, pruvatela, pruvatela, e po' m'annummenate.
Giacinto – Oh! basta, basta! Cheste sò cose da inorridire!
Bettina (di dietro) – Cesarì, Cesarì, addó staje?
Francesco Gabriello Starace
Fonte: F. G. Starace, L'avvocato Ninetta, Gennarelli, Napoli 1921.