Scena VI
Cesarino e detti.
Cesarino – (dal salotto) E bravo! e bravo la mia degnissima moglie... Essa me fa 'a gelosa, ma fa 'a parta faticata, me ne caccia d' 'a casa, fa na domanda di separazione, mente po' me vuleva cumbinà chisto trainiello.
Ninetta – Ah! 'o Presidente teneva a isso nascosto llà dinto, perciò ha fatto tutto stu chiasso.
Francesco – Ma vuje nun ve ne site juto pe l'ata porta?
Cesarino – No. Trattandosi che mia moglie steva ccà aggio voluto sentì chello che diceva, e aggio fatto bene. Perché adesso sono io che faccio la domanda di separazione.
Bettina – Vattenne, domanda di separazione. E tu t' 'a meretava na femmena accussì bella e dotta?
Ninetta – Dopo tutti i fatti succiese c' 'a stiratrice e che io ajersera sentette, mò te vuó truvà tu 'a coppa?
Cesarino – Ma almeno 'a stiratrice era na nnammurata mia quanno era scapolo, ma tu te n' 'e truvato uno mò frisco frisco. E po' m'è cagnato pe nu viecchio, nu scemo. Non te ne miette scuorno?
Ninetta – Presidè, vuje 'o state sentenno. Io sò femmena 'e chesto, ma ditelo voi.
Francesco – Ma io che ne saccio.
Ninetta – Vuje me cunuscite 'a piccerella e mi credete capace di un'azione simile?
Cesarino – Io 'a stiratrice nun 'a vedeva 'a tanto tiempo e ieri sera, se ci ho parlato, è stato pe farla sta zitto pecché vuleva fà na chiassata.
Ninetta – E te si scurdato d' 'a rasulata e d' 'e zirole che me voleva tirà.
Bettina – Essa tirava 'e zirole a te? io l'avarria tirata 'a lengua 'a dint' 'o radecone.
Francesco – Ma insomma 'a putarrisseve fenì.
Ninetta – Pe me è impossibile. Và, vattenne c' 'a stiratrice, cu chella lazzara, pecché tu cu chella si abituata a trattà, na signora nun 'a puó tené vicino.
Cesarino – Io songo nu signore di nascita e parle a me di lazzera.
Bettina – Già, nu signore cu l'ogne spaccate.
Cesarino – Vuje nun saccio da dó venite, e si aggia giudicà da mammeta toja, credo che in origine aveva essere o na guardaporta o na spicajola.
Bettina – Io guardaporta? Io spicajola? Neh, Presidè, l'avite ntiso? M'ha nzurdata dint' 'a casa vosta e nun le dicite niente?
Francesco – Ma io che nce pozzo fa?
Ninetta – E già, non haje comme scuntà l'arraggia e t' 'a scunte cu sta povera vecchia che nun t'ha fatto niente.
Bettina – Mamma mia era conosciuta, se chiammava Carmela Saccone e faceva a vammana... e 'o Presidente l'ha da sapé.
Francesco – Sarraggio sgravato quacche vota.
Cesarino – E io aggia avuto apparentà cu discendenti 'e vammana, io che sono figlio di un generale.
Bettina – Già, 'o generale d' 'e pezziente 'e S. Gennaro 'e Povere.
Cesarino – Io sò venuto a nobilizzarvi.
Bettina – Vattè, tu si nu sfelenza, nun tenive che magnà e te si appuiato ncuollo a figliema.
Cesarino – E già, m'ha portato chella dote.
Ninetta – Ti ho portato la mia laurea e le mie fatiche e t'aggio fatto fà 'o signore.
Bettina – Tu te si venuto a ghiettà ncopp' 'e spalle soje, disperatone che si.
Cesarino – Io ve sò venuto a purtà onore nfaccia.
Ninetta – Presidè chesto è troppo... e vuje nun ve movite? Tu 'e puosto onore nfaccia a me... a me che sò n'avvocato ed una letterata?
Bettina – Tenesse tant'onnore nfaccia pe quanto figliema ne tene sott' 'e scarpe.
Cesarino – Oh! Presidè, chesta me cimenta.
Francesco – Oh! mò faccio 'o pazzo mò. Ma 'a casa mia l'avite pigliata p' 'o mercato, pe na taverna, pa na piazza. Ieri sera v'appiccecasteve na vota, mò n'ata vota e io mò sferro veramente, piglio na mazza e ve secuto p' 'e grade... mò me pare che 'a putarrisseve fernì.
Francesco Gabriello Starace
Fonte: F. G. Starace, L'avvocato Ninetta, Gennarelli, Napoli 1921.